تجارتِ مسیحائی کلامِ ضیاءؔ

تجارتِ مسیحائی

کلام: ڈاکٹر ضیاءاللہ ضیاءؔ

drziaullahzia@gmail.com

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہم مسیحا لوگ ہیں، ہم لوگ سوداگر نہیں  

صحتِ عامہ ہے بس درکار، مال وزر نہیں

آپ کے ہمدرد ہم ہیں،  ہم سے دردِ دل کہیں 

دل دھڑکتے ہیں ہمارے سینے میں پتھر نہیں

بندہء بے دام و درہم آپ کی خدمت میں ہم  

خادمِ خلقِ خدا ہیں،  ہم کوئی  افسر نہیں

راضی ہو ہم سے خدا اور ہو تشفی آپ کی   

بس یہی مطلوب ہے،اس سے تو کچھ بڑھ کر نہیں

 اور ہوں گے جن کو ہے دولت کمانےکی ہوس 

ہم سگِ دنیا نہیں، ہم ایسے پیشہ ور نہیں

جائیدادیں اور جاگیریں بنائیں سیٹھ جی

  ہم کو خدمت کی لگن ہے، فکرِ بام و در نہیں

لوٹتے ہیں جو دکھی انسانیت کے نام پر

  اور ہی کچھ ہوں گے وہ انسان تو اکثر نہیں

ہاتھ ہوں نبضوں پہ نظریں جیب پر ایسا بھی کیا 

ایسے چارہ ساز ہم اور ایسے چارہ گر نہیں

کاروبارِ سیم و زر ناداں سمجھتا ہے اسے

  یہ عبادت ہے خدا کی، ظلم کا دفتر نہیں 

کیا کہیں خدمات کے شعبے تجارت بن گئے   

ساہوکاری عام ہے ، خادم نہیں، نوکر نہیں

جعل سازی اور دھوکہ بازیوں کے درمیاں  

سچ کی جو  کھولے  دکاں اس کا کوئی ہم سر نہیں

   پاک بین و پاک باز و پاک فطرت پاک جُو  

جس میں نہ ہو ایسی خُو وہ خلق کا یاور نہیں

جو سہارا نظمِ سیم وزر کو دے اہلِ قلم 

پروردہء اہل ستم ہے کوئی دانشور نہیں

پیشہء آباء رہا خدمت مریضوں کی سدا  

ڈاکٹر  ہم  ہیں ضیاءؔ ، بے کار کے شاعر نہیں